ഇടവഴിയിലെ നീ

ഒരിടവഴിയിൽ

വേലിപ്പൂക്കളുടെ താലപ്പൊലി 

പതിവായി  കാണാം

വ്യത്യസ്ത നിറങ്ങളിൽ 

മണങ്ങളിൽ വരെ .

കാലാന്തരങ്ങളിൽ പൂത്തും 

തളിർത്തും

കരിഞ്ഞും അവ  നിൽക്കുന്നു .

വളവും തിരിവുമുള്ള 

ഇടവഴി എപ്പോഴും നടന്നുകൊണ്ടേയിരിക്കും.

വളവിനപ്പുറം  ചിലപ്പോൾ

കളഞ്ഞുപോയൊരു 

പൂർവ്വവസന്തത്തെ 

കണ്ടുമുട്ടിയെന്നു വരും.

വഴിമുറിഞ്ഞ പോലെ  ഓർമ്മകൾ നിൽക്കും ,

പിന്നെ  ഉള്ളൊന്നു പിടയും.!

ഇടവഴിയിലെ കൊടുംവളവിൽ 

ഈ  വാരം ബ്ലയിഡ്കാരൻ   മുന്നിൽ 

പെടല്ലേയെന്ന്  കൊതിക്കെ  

പഴയ സാറിനെ പൊടുന്നനെ കാണും 

ചെന്ന് മിണ്ടണോ എന്നൊരു 

ചൂരൽച്ചുനയോർമ്മ തുടയിൽ 

വേഗത്തിൽ  താളം പിടിക്കും.

  

മനസ്സ് മുഴുവൻ ഒരാളെ നിനച്ച്

നടന്നാൽ വരുന്നതെല്ലാം

ഒരേ പുള്ളിപ്പാവാടയാണെന്ന് തോന്നും

കർപ്പൂര മണമുള്ള സന്ധ്യകളും

മാണിക്യ ചെമ്പഴുക്കയും 

ഇടം കണ്ണാൽ കവർന്നെടുത്ത 

കവിൾ കുങ്കുമച്ചുഴികളും   

കാലങ്ങളോളം കനവിൽ മാറാല 

മൂടി കിടക്കും

ഒരുവേള നീയെനിക്കെന്നു 

ഹൃദയത്തിൽ തൊട്ട മുദ്രകൾ 

ഓർമ്മയിലോമനിച്ച് 

കാലം പിന്നെയും ധമനികളിൽ 

വേദനയിറ്റിച്ച് ഒഴുകും

ഒരിടവഴി നിന്നിൽ തുടങ്ങി 

നിന്നിലവസാനിക്കും

വേലിയിലാകെ മതിലുകൾ പരകായം പ്രവേശിക്കും 

ഇടവഴി റോഡാകും

മറന്നു കാണുമെന്ന് കരുതി

വെറുതെ പൂമണമുള്ള സന്ധ്യകളെ

നെഞ്ചിൽ  പേറും

വഴി പിന്നെയും നീളുകയാണല്ലോ 

ആരോരുമറിയാതെ

നമ്മളിങ്ങനെ കാലങ്ങളോളം 

നടക്കുകയാണല്ലോ.

വല്ല്യത്തേയ്ക്കുള്ള വഴികൾ

നിറമുള്ളൊരോർമ്മയാ

ണെന്നിൽ

നീളുമൊരു കവിതയെന്നപോൽ
ഹൃദയം
തുടിച്ച കാലം

നീയാം സ്നേഹസുമത്തിൻ
പരിമളമടർന്നെന്നിൽ
തളിർ സ്പർശമലിഞ്ഞ
പെരുമലർ കാലം

നിലാവിലൊരോണ പ്പുടവയണിഞ്ഞ് കരവും കവർന്നു ഞാൻ നിന്നകാലം
ഒരശകൊശൽ പാട്ടിന്നോർമ്മയിൽ
ചിറകു വീശിക്കുഴഞ്ഞ പൂമ്പാറ്റ ഞാൻ

കടവിനിക്കരെ നീയിരിക്കും തോണിയിൽ കനവുകൾ എത്രയോ തുഴയെറിഞ്ഞു 

ആരാരുമറിയാതെ മഴക്കുടകൾ പാറുന്നു
കല്ലടയാറ്റിലെൻ മൗന ജലോത്സവം

ഒരു നോക്ക് കാണുവാൻനിന്നിലൂടൊ ഴുകുമൊരുപുഴയുടെ മനസ്സിറമ്പിൽ വന്ന് നിൽക്കുന്നു മഴയാൽ കുതിർന്നൊരു ചൂണ്ടക്കാലം

പഴകിയ വീഞ്ഞിന്റെ ലഹരിയെന്നല്ലേ പ്രണയിനിയുടെയഴകിനെ വാഴ്ത്തിയ പ്രിയ ഗീതത്തിലന്നേ ആരോ കുറിച്ചതും

വേലിപ്പൂക്കൾ തുന്നിയ പാവാടയുലയുന്നു നിന്റെ മിന്നലാട്ടം മനസ്സിൽ തെളിയുന്നു 

അകലെയായി അനുരാഗ ചിരിയലകൾ ഉയരുന്നു
ഓടിയകലുന്ന പാദസരമേളം നെഞ്ചിൽ ഉണരുന്നു

 
ഹൃത്തിലന്നൊട്ടിച്ചൊരനുരാഗ മഞ്ഞിനെ നുണഞ്ഞങ്ങനെ 

കാലമിരുളവേ
നിറയുമാകാശ നക്ഷത്ര ലോകത്തിൽ
ശുഭ്ര ദീപ്തിയായി നീ കാലയവനികയിൽ നിറഞ്ഞു നിൽക്കുന്നു.

വല്യത്തെൽപ്പീ സ്കൂളിൽ
വെച്ചന്നാദ്യ പ്രേമക്കതിരാടിയ

വർഷകാലക്കുളിരിന്നെവിടെ

നിറമെഴുമോർമ്മകളുടെ കുട നിവർത്തുവാൻ ഇനിയുമെത്ര ജൻമം പിറവി വേണ്ടൂ...

ശന്തനു കല്ലടയിൽ